Ég er ekki að standa mig
Djöfullinn
Ég veit alveg hvað ég þarf að gera ég geri það bara ekki
Ég ætlaði að vera rosalega dugleg, var komin í þokkalegan gír, hljóp á brettinu 5-6 sinnum í viku. Svo fór ég norður eða eitthvað, man ekki einu sinni hvað það var lengur, eitthvað sem braut upp regluna og ég bara koxaði á þessu, hef ekki komið mér af stað aftur að neinu viti.
Hef aðeins verið að synda, en samt ekkert nóg, bara þegar ég er að keyra á æfingar og það er orðið svo sjaldan því við erum svo mörg að skiptast á.
Ég var eitthvað að reyna að greina mig, eða þetta tímabil sem ég er í núna. Ég fann það út að ég væri orðin leið á því að hlaupa á brettinu og horfa bara á hvítann vegginn fyrir framan mig, ok fara þá út, gerði það, entist andskotann ekkert!
hvað var þá að, jú ískaldur nýstandi norðangarri sem býr á veginum ca frá fjósinu út að ruslagámum, djöfull sem er erfitt að hlaupa á móti honum-hvað er hægt að gera? jú fara aðra leið-gerði ég það ..... nei
Svo sá ég í Borgarnesi rosa flott, það er búið að merkja og mæla leiðir sem er sniðugt að hlaupa nálægt íþróttamiðstöðinni, þá hugsaði ég, já þetta er sniðugt ég mynd örugglega hlaupa svona leið, alltaf eitthvað nýtt að sjá ekki bara auður malarvegur eða hvítur veggur svo maður er komin á leiðarenda áður en maður veit af, og ég tala nú ekki um að enda við íþróttamiðstöðina og skella sér í laugina á eftir. Já þetta væri pottþétt eitthvað fyrir mig. En þetta er bara enn ein afsökunin og samviskan mín fann auðvitað lausn á þessu vandamáli líka, ég get auðvitað bara búið mér til svona hring á Hvanneyri, hlaupið "utan um " þorpið, þá fæ ég þessi áhrif að það er alltaf eitthvað nýtt, stutt í næsta "mælstón" ég næ þangað ég kemst þangað osfv. og áður en ég veit af er ég komin heim aftur. já og veðuráhrifin verða minni því ég er inni í þorpinu.
Ég er búin að mæla, gerði einn hring sem er 2,7 og annan sem er 3,5 fínir til að byrja með, ekkert of langt, bara drulla sér út og gera þetta.
KOMA SVO

Ekki góðar fréttir af mér og hreyfing
Nei ég hef ekki verið að standa mig undanfarna daga. Ótrúlegt hvað það er erfitt að detta úr takti. En amk ég hef ekki verið að hlaupa síðustu daga, bara ganga, já og byrjaði aftur í Jóga. Sem sagt ekki nóg gott en ný vika og stórt spark í rass, nú verður tekið á því.

Helgin var samt góð, reyndar ekki hreyfingarlega, en góð engu að síður. Mamma og co komu á fimmtudaginn. Það var yndislegt að fá þau til okkar, svo kíkti ég á góðar vinkonur þegar þau skruppu í bæjarferð. En nú eru þau farin og við dettum í rútínuna, skuttl á æfingar, hreyfing og fundir.

jæja hreyfing gengur vel

ég hreyfði mig reyndar alveg í lágmarki um helgina því við fórum norður, venjulega hefði ég hreyft mig sérstaklega mikið í svona norðurferð en þar sem ég var með ungabarn var það ekki alveg í boði. En það var verið að smala, svo mitt hlutverk var í þetta skiptið að elda ofaní svanga smalamenn og svo fékk ég aðeins að vera í fjárhúsinu. Bjarni var alveg að fíla það svo þetta var ljómandi góð helgi (svona fyrir utan hreyfinguna).

Mánudagur og þirðjudagur voru ekki alveg þeir bestu hjá litla manninum, hann var rellinn og átti eitthvað erfitt, svo ég var frekar mikið þreytt og tætt. En ég hreyfði mig á mánudeginum þegar óskar var á æfingu, en ég tók frí á þriðjudeginum eins og Óskar, bara hafði mig ekki í hreyfingu var alveg ónýt. En miðvikudagurinn var miklu betri og ég hafði mig af stað, prófaði meira að segja að hreyfa mig úti, skokkað 3 km, það var pínu erfitt á móti ísköldu norðan roki sem virðist eiga heima á ásnum og út að jörfa. Fimmtudagur var ljómandi líka yndislegt veður og ég tók kraftgöngu á hlaupabrautinni í Borgó á meðan óskar var í körfu, það var ljómandi góð hreyfing svitnaði fínt og Bjarni kátur í kerrunni góðu.

Í dag kom Gunna í heimsókn, sem var alveg yndislegt. Við gátum spjallað hellings og fórum svo og fengum okkur kaffi hjá Geira á meðan Óskar var í fótbolta og svo fórum við í ungbarnasund með Bjarna, Gunna skellti sér bara með sem var geggjað, vonandi skemmti hún sér jafn vel og við Bjarni, amk var hellings hjálp að hafa hana með.

Á morgun er skipulögð bæjarferð, þurfum aðeins að erindast og hitta Jakob og Íris enda aðeins of langt síðan við hittum þau seinast. Á sunnudaginn er karfa, sund og afmæli íþróttahússins. Svo er stefnan að hausta garðinn, eða sem sagt græja hann fyrir haustið svo ekkert fjúki eða fara í kássu.

jæja hreyfing gengur sem sagt vel og ég ætla að taka laugardags hreyfingu fyrst ég missti af þriðjudeginum svo ég nái sex í vikunni.

Bara aðeins að láta vita af mér.
Æfingaplanið gengur líka svona þrusu vel. auðvitað eru einhverjir hnökrar í upphafi, það er eðlilegt. En það sem ég hef fundið út er að það er ekki svo gott að æfa á sama tíma og Óskar, það gengur sjaldnast, en stend við að æfa sömu daga. En ég er oftast með Bjarna með mér í Borgarnes og ég reyndar labbaði með hann í kerrunni á hlaupabrautinni um daginn og það var fínt, en oftast hentar það mér bara betur að skokka á brettinu þegar ég kem heim og Tryggvi er komin heim til að vera með Bjarna. Sem sagt, ég hef ekkert misst úr æfingu síðan ég bloggaði seinast og er að finna mér góðan takt í þessu.
Svo reyndar getur verið að ég taki sundæfingu á sunnudögum þegar ég keyri Óskar því oftast getur Tryggvi örugglega verið með Bjarna á sunnudögum og þá get ég skellt mér í sund.
Ég er farin að skokka 3 km á brettinu og held mig við þá vegalengt út þessa viku.
líf og fjör

já haustið er að koma.

Haustið er yndislegur tími, ég held að það sé uppáhalds árstíðin mín. EN það er mikið til vegna þess að ég er alin upp fyrir norðan held ég. Ég er ólst upp við það að á haustin byrjar auðvitað skólinn en það er nú ekkert sérstaklega norðlenskt fyrirbæri, en hinsvegar þá koma hauststillurnar yndislegu. Heima er nefninlega mjög þrálát hafgola allt sumarið, ísköld hafgola sem maður þarf að skýla sér fyrir svo að maður geti notið sumarsins. En svo þegar haustið kemur þá lækkar lofthiti aðeins, nóg til þess að hafgolan stoppar og það verður yndislegt veður. Það er oft hlýtt áfram og yndislegt endalaust logn. Svo mikið logn að það getur verið erfitt að þurrka þvott úti á snúru, svo mikið logn að maður heyrir allt sem er að gerast, yndislegt logn. Svo breytir allt um liti, gróðurinn verður svo fallega rauður og gulur með þessum græna, svo kemur einstaka rigningarskúr sem hreinsar loftið.
Hustið er klárlega besta árstíðin.

Fréttir af okkur, allt gengur vel. Við vorum rosa lengi fyrir norðan, eða næstum þrjár vikur. Það var yndislegt að vera svona lengi með fjölskyldu og hitta vini. Vorum samt ekkert ofur dugleg að heimsækja fólk, vorum mikið bara með nánustu og gerðum svo eitthvað skemmtilegt líka eins og að skreppa út í Hrísey og í sund og svona.
Núna er allt að detta í rútínu, Óskar Óðinn byrjaður í skólanum og Tryggvi að vinna. Þá erum við Bjarni ein heima á daginn og dúllum okkur eitthvað. Hann er voða góður greyið. Hann er rosa duglegur að stækka og ég hugsa að ég fari að bjóða honum smá graut með brjóstamjólkinni fljótlega. Það er náttúrulega svo rosalega lítið sem hann fær fyrst, ætla að venja hann mjög rólega við svo það gangi vel. Hann er náttúrulega orðin rúmlega 4.mánaða, ég hugsa að um 5. mánaða sé bara fínt að vera farin að fá svolítinn graut með svo maður sé ekki alltaf eins rosalega svangur.
Óskar Óðinn er ekki bara byrjaður í skólanum heldur eru allar æfingar komnar á fullt líka, hann er rosa duglegur í íþróttum. Hann er bæði að æfa fótbolta og körfubolta í Borgarnesi svo það gera sex æfingar á viku hjá honum. Ég átti aðeins erfitt með að koma mér aftur af stað í hreyfingu eftir að við komum heim úr ferðalaginu svo núna þegar ég var að keyra Óskar einn daginn þá datt mér snjallræði í hug. Núna ætla ég að æfa þegar hann æfir. Fyrst hann getur æft sex sinnum í viku þá get ég það líka. Þegar ég keyri hann á æfingar nýti ég tímann og æfi líka. Ég get skokkað á hlaupabrautinni eða synt ef ég er ekki með Bjarna með mér, en ef ég er með Bjarna þá tek ég bara kerruna hans og fer í göngutúr með hann eða reyni jafnvel að skokka með hann á hlaupabrautinni. Hef reyndar ekki prófað að skokka með kerruna, það kemur í ljós hvernig það gengur . Ef ég er ekki að keyra þá æfi ég bara hérna heima og ég er búin að gera það tvisvar, í annað skiptið var ég ekki að keyra en í hitt skiptið keyrði ég og fór svo heim í milli því Óskar er á tveim æfingum einn daginn og þá fer ég heim á milli. Þegar ég æfi heima þá fer ég á brettið. Ég er búin að skokka 2,5 km í hvort skipti og það gengur mjög vel, ég ætla að halda þeirri vegalengd út vikuna og auka svo upp í 3 km. Svona ætla ég að auka vegalengdina smám saman. Svo kannski þegar ég get orðið hlaupið eitthvað lengra til þá kannski fer ég út líka inn á milli. En sem sagt hreyfingarplanið mitt er núna þegar Óskar er á æfingu, en hann er reyndar á 6 æfingum á 5 dögum í sept, það breytist eitthvað í okt þegar fótboltaæfingarnar fara inn. En ég ætla að vera á þessum 5 dögum og svo bæti ég bara sjöttu æfingunni við á einn frídaginn, en ég held að sex æfingar á viku hjá mér líka séu gott plan.

Rosalega er ég ódugleg að blogga. Þetta gengur ekki!
Sumarið hefur verið mjög undarlegt, ég hef verið miklu meira inni en í venjulegu sumri og ferðast miklu minna en í venjulegu sumri, já og bara gert miklu minna en í venjulegu sumri. En það er nú góð skýring á því, ég var að eignast barn og eyði mestum tíma mínum í litla kútinn minn. Það var gríðarlega erfitt fyrst að geta ekki bara farið út þegar ég vildi og gera bara það sem ég vil, ég hef getað gert það svo lengi. En núna er ég alveg búin að tjúna mig niður og suma daga kemst ég lítið sem ekkert út og það er bara allt í lagi. Næsta sumar verður tekið með trompi, þá njótum við þess bæði að vera úti og ég á sko alveg örugglega ekki eftir að eiga í vandræðum með að fá litla manninn með mér út þegar hann stækkar.
En það er svo sem ekki mikið af okkur að frétta, hann er duglegur að stækka og dafnar mjög vel, bara akkúrat eins og það á að vera. Ég þarf að vera aðeins dugleg að drekka vatn, bæði er heitt úti og svo er ég náttúrulega mjólkandi
Við fórum í bæjarferð á miðvikudag til þess að vera með tengdapabba á meðan tengdamamma var í heilaskurðaðgerð, aðgerðin tók mun lengri tíma en áætlað var og við vildum ekki skilja gamla manninn eftir einann svo við gistum bara hjá honum, heppilega höfðum við keypt rúmföt um daginn svo við vorum með rúmföt með okkur til að nota í íbúðinni. Aðgerðin gekk vel svo það var ljómandi. VIð skelltum okkur svo aftur í bæinn í gær til að hitta hana aðeins, hún var ótrúlega hress og fer norður með sjúkraflugi í dag og fær að liggja á FSA. Það er náttúrulega miklu betra fyrir hana og sérstaklega tengdapabba sem kemst þá heim á kvöldin. Við nýttum ferðina og keyptum okkur notaða kerru fyrir Bjarna. litla og netta sem er heppileg í skottið þegar við förum í ferðalag, vagninn er svo plássfrekur og svo nýtist hún vel þegar hann stækkar og þarf ekki vagn.
smá dugnaðar í lokin, ég er farin að fara út á kvöldin og skokka, get skokkað miklu meira en ég bjóst við sem er vel! meira af því síðar

Allt gengur sinn vana gang hérna. Bjarni litli er duglegur að drekka og stækka, ég mjólka og mjólka, ég er viss um að ég yrði góð mjólkurkýr. Fyrir utan það kannski að ég gæti ekki fætt kálfinn og yrði líklega slátrað fyrir vikið!!
Ég hef aðeins dúllað mér í garðinum en samt ekki nærri því eins mikið og í fyrra, en það er bara vegna þess að það er ekkert sérstaklega langur tími sem ég hef lausann, það er einhvernveginn alltaf aftur komið að mjöltum En það er allt í lagi, þetta er bara svona þetta sumarið.
Það eru svolítil viðbrigði að vera svona rosalega bundin, það er alls ekkert slæmt, bara öðruvísi
Það sem helst er að frétta af mér er að ég var í kerrupúli síðustu vikur, það er rosa gott maður. Fara út og hitta aðrar kerlur með kríli og púla svolítið. Ég ætla að halda áfram núna að fara sjálf út þegar námskeiðið er búið. Svo langar mig að fara að hlaupa aftur, ég er náttúrulega vangefið þung á mér núna svo ég þarf að byrja alveg á byrjun. En núna veit ég vel að ég get þetta, ég var farin að geta skokkað alveg þónokkuð og fyrst ég gat það get ég það aftur. Ég hugsa samt að ég byrji bara á brettinu hérna inni, ég er eitthvað svo spéhrædd að skokka úti þar sem allir geta séð mig, sérstaklega þegar ég get skokkað svona stutt í einu eins og núna. Svo ég byrja bara á brettinu, fer svo kannski eitthvað suður í land eins og ég gerði seinast þegar ég var að koma mér af stað og svo fer ég hringinn eins og ég gerði. Fínt plan! Ekkert stress, ég geri þetta bara á mínum hraða.

Það er ekki seinna vænna en að fá sumarið á klakann. Það er langt síðan maður hefur þurft að bíða svona eftir því, alveg fram í miðjan júní. Hvað er málið?
Apríl var víst þokkalegur fyrir norðan, en hann var ekkert sérstakur hérna og maí var hræðilegur um allt land, skítakuldi og snjór. Svo kom júní og allir þráðu sumarið, en nei það hlýnaði ekki hót. En nú held ég að þetta sé komið, það er búið að vera þokkalega hlýtt núna í tvo daga. Reyndar er helvítis rok alla daga allann liðlangann daginn. Ég er alveg að missa kúlið yfir þessu roki, maður er svoleiðis vindbarin ef maður vogar sér undan húsvegg. Ég er alltaf í vinheldum jakka svo ég stífllist ekki og það er náttúrulega ekki hægt að fara með Bjarna litla á milli staða nema vel varin, teppi yfir bílstólnum þegar við förum í bílinn eða vel varin ofan í vagni. Annars er hann mest bara inni, ég læðist svo út á pall þegar hann sefur svo ég get drukkið í mig þessa sólargeisla sem láta loksins sjá sig. Einu sinni var þetta svona, einu sinni var ekkert óvanalegt að maí væri kaldur og leiðinlegur og sumarið kæmi ekkert fyrr en í júní. Við höfum bara haft það svo rosa gott undanfarin ár og sumarið látið sjá sig í maí og allt komið í fúllsving í júní.
Kuldinn og reyndar annir hafa valdið því að garðurinn og garðvinnan hefur setið á hakanum. En ég er búin að sá svolitlu og stefni til Árna í vikunni að kaupa mér nokkrar grænmetisplöntur til að bæta á og jafnvel nokkur sumarblóm líka svona til að gera sætt á pallinum

Ég las aðeins yfir seinasta blogg, það er svo langt síðan ég skrifaði það og mig langaði bara að rifja það aðeins upp. Hvað ég var að pæla þegar ég skrifaði seinast.
Það sem hefur breyst er að litli kútur sér til þess að ég drepist ekki úr leiðindum! Eins og ég komast að orði í seinasta bloggi. Þ.e að ég drepist úr leiðindum á meðan hann sefur! eins og ég orðaði það. En hann ákvað að sofa bara lítið. Honum er mikið illt í maganum og á erfitt með að losa sig við loft. Hann er líka svo graðugur að hann drekkur inn mikið af lofti. Svo dagarnir fara mest í það að ganga með hann um gólf og næturnar í brölt líka. Það varð til þess að núna um daginn var ég komin með svo mikla vöðvabólgu að ég lá bara fyrir. Sigtryggur þurfti að hugsa að mestu um litla kút og bara rétta mér hann þegar hann þurfti að drekka. Ég var alveg að steindrepast. En eftir það passa ég mig betur, passa mig að koma mér sérstaklega vel fyrir þegar ég gef honum að drekka og reyni að sitja meira með hann en að ganga um gólf og svo reyni ég að nota vagninn inni líka, stundum er hann rólegur ef ég keyri hann um í vagninum eða rugga honum.
Íris kom svo og vigtaði hann og sagði okkur þá frá Minifom dropunum sem er hægt að kaupa í apótekinu, það eru dropar sem maður gefur krílinu áður en það drekkur og þeir eiga að eyða froðu sem myndast í maganum og veldur svo rosalegum vindverkjum. Við keyptum þessa dropa á föstudaginn og hann hefur verið að fá þá núna, þetta er fjórði dagurinn. Það stendur á leiðbeiningunum að maður verði að gefa þessu 2-3 daga til að sjá til hvort það virki, Íris sagði okkur að gefa þessu allt að 5 daga. Hún sagði líka að það væri mjög misjafnt hvað fólki finndist um þetta, sumir séu ánægðir með þá og aðrir ekki.
Ég þori varla að segja hvað mér finnst, ohh það er svo típískt að maður segi að þetta virki og verði voða ánægður og þá pommm allt í sama far aftur. ER það ekki típískt að maður segi eitt og þá virkar það ekki lengur. ÉG lærði það amk með Óskar Óðinn lítinn, ef ég sagði að hann svæfi vel þá, púmm hætti hann því, ef ég sagði að hann væri úrillur á morgnanna þá púmm fínn á morgnanna. Allt var síbreytilegt og ég gat aldrei sagt að það væri svona eða hinsvegin. En Tryggvi talar um að hann finni mun á litla kút og ég fékk þokkalegan nætursvefn seinustu tvær nætur, en það hefur alveg gerst áður líka! Það eina sem ég vona að þessir dropar geri er að litla kút líði betur.

Þá er litla krílið mitt komið í heiminn. Litli kútur fæddist 27. apríl á afmælisdag Jóns Bjarka frænda síns, en þeir Jón eru bræðra synir. En það truflar afmælisveislur líklega ekki mikið því Jón Bjarki átti 18 ára afmæli þennan dag, svo það eru langt á milli.
Það gengur rosa vel með litla ennþá, hann er núna rétt rúmlega tveggja vikna og er duglegur að drekka og stækka.
En þetta þýðir að nú er ég heimavinnandi húsmóðir, ég vinn heima. Mín vinna felur í sér fyrst og fremst, ummönnun á þessu litla kríli. Það er ótrúlegt til þess að hugsa hvað maðurinn hefur náð langt á jörðinni miðað við hvað við erum ósjálfbjarga þegar við fæðumst. Ég sinni auðvitað fleiri verkefnum á heimilinu enda myndi ég annars drepast úr leiðindum á því að sitja bara og gera ekkert á meðan kúturinn sefur.

Ég fór aðeins að hugsa um það hvort ég væri umhverfisvæn, æ það kom upp í hugann eftir að Sigtryggur kom með einhverja athugasemd um ruslið. Ég man ekki alveg hver hún var. En þá fór ég að hugsa. Og ég held að niðurstaðan sé sú að ég hugsi eitthvað um umhverfið og ég taki meira tillit til þess  núna en ég gerði áður. Ég flokka sorpið frá heimilinu, ég flokka það í lífrænt, plast, fernur, málma, pappír, pappa, spilliefni og svo almennt, sem er lengi að fyllast núna. Ég nota bílinn helst ekki innanbæjar ef ég get gengið eða hjólað. Ég nota bílinn samt leiðinlega mikið en það fylgir því bara að búa á stað eins og Hvanneyri. Ég nota taubleyjur á litla kút, því mér ofbíður verð á einnotableyjum og mér hrillir við þeim tíma sem það tekur að brjóta þær niður, þetta er náttúrulega plast sem er ekki hægt að endurvinna. En ég veit vel að ég get gert meira og ég held að ég komi til með að gera það í framtíðinni. Enda gerast góðir hlutir hægt. Næsta mál á dagskrá er að muna eftir tau pokunum í búðina, enda hef ég ekkert að gera með alla þessa plastpoka.

Bara svona smá hugleiðingar

Jæja þá er páskafríið alveg að bresta á. Reyndar er Óskar Óðinn komin í frí, en ætli við gömlu þurfum ekki að vinna eitthvað aðeins meira
Ég ætla nú samt að fara að taka því rólega bara, enda rétt rúm vika í keisarann, en það er stefnt á 26. apríl. Ég fer reyndar í sónar og monitor á morgun og sjáum til hvernig það kemur út. Vonandi bara allt eins og það á að vera. Það væri voða gott fyrir krílið að fá að vera inni til 26, þá er ég komin 38 vikur og 4 daga.

Annars er það kannski helst að frétta að ég opnaði barnalandssíðuna okkar aftur. Hún hefur legið niðri í ár. Við höfum ekkert verið að setja þar inn myndir eða fréttir, enda einhvernveginn breytist þetta þegar stubburinn er orðin svona stór. En núna er von á fjölgun og þá gerast hlutirnir hratt svo það er um að gera að opna aftur og leyfa fólkinu okkar að fyljgast með. Enda erum við hérna á vesturlandi og lang flestir fyrir norðan svo þau verða að láta sér myndir duga til að byrja með. Við stefnum svo á að fara norður í sumar og sýna gripinn

Annars fer þessi helgi í rólegheit, ég hitti nokkrar kerlur í mat í gær, við elduðum saman indverskt og borðuðum. Það var rosa kósý og gaman. Svo ætla ég að kíkja á aðrar gellur í kvöld. Nóg að gera í sósjallífinu þessa dagana enda er það bara fínt svo verður maður upptekin við annað á næstunni.

Karlinn minn elskulegur hefur farið hamförum á heimilinu núna fyrir helgina. Hann var heima með Óskar í gær og gerði líka svona fínt. Yndislegt alveg. Ég gat svo dúllað mér við að setja upp smá páskaskraut í morgun svo nú er bara mjög kósý hjá okkur.

Jæja læt þetta duga í bili góða helgi gott fólk

Jebb ég á afmæli í dag
Ég er í vinnunni og ákvað að gefa mér smá tíma til að skrifa örstutt blogg svona í tilefni dagsins
Ég fór ekki með köku í vinnuna í morgun... enda finnst mér eðlilegast að afmælisbarnið komi ekki með köku heldur fái köku Nei það er ekkert þess vegna, ég hafði hugsað mér að skella í eina í gær, en gleymdi mér svo alveg í grímuhönnun og smíðum í gærkvöldi með Óskar Óðni. En það er undirbúningur fyrir árshátíðina sem er í næstu viku. Svo ég steingleymdi því bara að ég ætlaði að græja köku og því fór ég kökulaus í morgun. En það er allt í lagi, það er fámennt á nautastöðinni í dag. Kem þeim bara á óvart einhvern daginn í næstu viku og þá fá kannski fleiri að njóta.
Nú er ég orðin þrjátíu og eitthvað.... það er pínu mikið
En þetta verður pottþétt góður dagur, hann byrjaði amk vel, ég vaknaði við koss og knús frá honum Sigtryggi mínum, svo kom Óskar Óðinn og skreið uppí og knúsaði mömmu sína og gaf mér titilinn "besta mamma í öllum heiminum" er hægt að fá betri afmælisgjöf

Restin af deginum, eða það sem er planað, verður líka góð. Ég ætla að vinna fram að hádegi, skottast þá heim og dúlla mér þar. Skelli líklega í kökuna sem ég ætlaði að gera fyrir vinnuna bara því það er svo gott að fá smá kökubita á afmælinu sínu. Svo fæ ég góða vini í mat í kvöld, ætla að elda rosa góða súpu handa okkur. Mjög kósý bara.

En aðrar fréttir eru þær að ég fór í mæðraskoðun í gær, Hafdís ljósan mín skoðaði mig vel og vandlega, ég er spræk blóðþrýstingur 120/80, eðlilegt prótein og sykur í þvagi, en slatta bjúgur sem ég losna nú líklega ekkert við úr þessu fyrr en bara eftir keisarann. Hafdís sagði mér líka að hún væri búin að tala hellings um mig, bæði á heilsugæslunni í Borgarnesi svo læknarnir viti af mér, ef ég þyrfti að hringja á sjúkrabíl. En það eru fyrirmælin, ef eitthvað fer af stað, þá bara sjúkrabíll. og svo líka á sjúkrahúsinu á Akranesi svo ljósurnar þar viti af mér þegar ég kem, hvort sem það verður með hraði eða ekki Hún sagði mér líka að hún hefði haldið uppi smá áróðri fyrir því að endurskoða skurðardagsetninguna þegar ég kem næsta sunnudag í sónar og monitor þar. Hún vill helst að krílið verði sótt fyrir páska en þá er ég komin rétt tæpar 38 í staðin fyrir eftir páska þegar ég er komin rétt tæpar 39. Þetta gæti haft það í för með sér að krílið yrði með smá vot lungu, en það er eitthvað sem er vel hægt að díla við. Því hún hefur meiri áhyggjur af leginu mínu, vill ekki þenja það of mikið og eiga það í hættu að það fari illa þetta hljómar ekkert sérstaklega vel, en ég er nokkuð róleg bara, ég læt bara eins og prinsessa heima hjá mér, geri ekkert sem veldur álagi á legið og karlarnir mínir eru rosa duglegir að snúast í kringum mig. Svo veitir það góða öryggistilfinningu að fólkið sem þarf þá að sinna mér ef eitthvað gerist veit af mér svo ég þarf ekkert að eyða tíma í að útskýra fyrir þeim að þetta sé ekki alveg hefðbundin meðganga og það sé bara pínu ves ef ég fer af stað

jæja nóg af þessu, góða helgi allir sem nenna að lesa

Þetta er vikan sem ég er í Borgarnesi!!
Jamm ég fór þrjár ferðir í Borgarnes á mánudaginn, eina á þriðjudaginn, eina í dag, tvær á morgun. Þetta er náttúrulega ekki eðlilegt.... En svona er þetta þegar maður er að keyra á æfingar, körfu og fótbolta, þarf að mæta í mæðraskoðun, er foreldratengiliður, er í stjórn knattspyrnudeildar og ég veit ekki hvað. Þetta er sem sagt fundamaraþon vika. Sem bættist bara ofan á þetta venjulega, æfingarnar. Já og svo er það mæðraskoðun á hverjum fimmtudegi núna fram að burði. Eins gott að fylgjast vel með krílinu, já og mér
Sigtryggur spurði mig hvers vegna við ættum ekki bara heima í Borgarnesi þegar ég var að segja honum skipulag vikunnar á mánudaginn og við vorum að keyra fyrstu ferðina í Borgarnes en ég svaraði honum því bara til að það væri vegna þess að við vinnum ekki þar. Við komum alltaf til með að keyra á æfingar, en þær eru ekki alla virka daga eins og vinnan, ég ætla ekki að vera í mæðraskoðun endalaust, ég ætla heldur ekki að vera í stjórn endalaust og ég verð heldur ekki foreldratengiliður endalaust. Svo þetta er tímabundið ástand. Plús það að þrír fundir í sömu viku er sérstakt ástand.
En það væri alveg gaman að eiga sparneytin bíl þegar maður þarf að keyra svona mikið!!

Annars er ég bara góð, eins og ég sagði er ég undir ströngu eftirliti bæði ljósmóður og læknis. Hitti ljósuna á hverjum fimmtudegi en lækninn á hverjum sunnudegi. Ljósan skoðar þetta venjulega, þvag, blóðþrýsting, hjartslátt og svona. Læknirinn kíkir betur, mælir krílið í sónar og athugar hvort ekki sé allt í gúddí þarna inni og svo ligg ég í monitor í svolitla stund. Ég er samt mjög hress, þannig séð, blóðþrýstingur og þvag eins og það best getur orðið. En ég er orðin pínu þreytt í grindinni, enda átakið aðeins vitlaust þar sem ég er bara að nota hálft legið og það teygist eins og enginn sé morgundagurinn. En það er einmitt ástæðan fyrir þessu aukna eftirliti, það er legið mitt skrítna

Sigtryggur minn er voða duglegur heima, veit ég á ekkert að hamast neitt því ég fæ þá bara verki og vesen. Hann hefur verið að setja saman húsgögn, keyptum okkur kommóðu og skiptiborð. Ákváðum að vera bara grand á því Svo núna ætla ég að fara að þvo litlar samfellur og galla, aðeins að byrja að græja. Svona svo það sé eitthvað tilbúið ef ég yrði nú skorin eitthvað fyrr en planað er

Ég er heima, enda að reyna að gera eins og læknir og ljósa segja mér Hafa það rólegt.
Ég er með kveikt á útvarpinu og hlustaði á morgunþáttinn með öðru í morgun, svo sat ég við útvarpið og hlustaði á virka morgna á meðan ég prjónaði. Fréttir og allt það, en núna er ég að spá í að slökkva, eða setja yfir á cd. Það er einhver asni í útvarpinu mínu

vikan hefur verið fín, vinna, slaka og svona bara þetta venjulega. Í gær var ég eins og drusla, með massa stingi og samdrætti eftir eina nótt af verkjum. Þetta var ekki alveg að gera sig, enda var ljósan ekki ánægð með mig. En ég þarf bara að hvíla og reyna að láta þetta líða hjá því það er ekki alveg tími strax. Kíkti aðeins í saumó og fékk rosa góðar veitingar, VÁ. En ég stoppaði stutt, enda þreytt og dösuð með stífa bumbu. Ekki alveg að gera sig.

Kleinarinn, er það aprílgabbið, það hlýtur að vera, hver ætti að vilja éta 50% kleinuhring og 50% hamborgara saman. Kleinuhringur er fínn og hammari er það líka, en saman.... uuuu nei

Ein að missa sig í blogginu
Ég skellti mér á fótboltamót, enda var þetta stutt mót. Stóð frá 9 til 12. Strákarnir stóðu sig ekkert smá vel, rosalega flottir fótboltastrákar þarna á ferð. Rúlluðu upp hverjum leiknum á fætur öðrum. Skelltum okkur svo í Ikea, fengum okkur að borða þar og versluðum það sem vantaði, fengum reyndar ekki alveg allt. Ein vara í pöntun, vonandi skilar hún sér tímanlega

Svo komum við aðeins við í dótabúð, Óskar Óðinn er aðeins búin að vera að safna sér fyrir einhverju alveg spes legói og nú var komið að því að versla. Ég hélt hann myndi guggna á þessu, enda mikill peningur sem færi úr veskinu hans. En nei þetta var það sem hann vildi. Ég sagði honum að þegar þessi peningur væri komin úr veskinu væri hann farinn, það myndi eyðast úr veskinu. Svarið sem ég fékk var ágætt, "já en ég get unnið mér inn meira og safnað aftur" Svo það var ákveðið, hann vildi eyða peningnum í legóið og maður lærir ekkert á þetta nema pæla í þessu og sjá hvað gerist, hvernig þetta virkar. Peningar vaxa ekki á trjánum.

Svo kíktum við á Jakob og Íris sem var ljómandi gott, þau eru að koma sér mjög vel fyrir á góðum stað í Mosó. Þegar við komum heim fór Óskar strax að byggja legóið, pabbi hans var honum innan handar, ég dottaði í sófanum eftir langann dag Alltaf jafn fersk.

Í morgun vaknaði Óskar rétt fyrir sjö, hann kom inn til okkar til að sjá hvað klukkan væri og þar sem hún var ekki orðin sjö var ekki alveg komin fótaferðatími svo hann lagðist hjá okkur bara, um leið og útvarpið fór af stað spratt hann á fætur. Kom svo eftir smá stund aftur til okkar og klappaði mér blíðlega, ég opnaði augun voða mygluð og sá að hann var klæddur. Ég varð náttúrulega ekkert smá hissa því hann sonur minn er ekki sá morgunhressasti svona venjulega, hann nennir yfirleitt ekki framúrrúminu heldur kúldrast þar þangað til ég rek hann á fætur, svo þarf alltaf að tuða hann í fötin því hann nennir ekki að klæða sig. En ekki í morgun, nei nei, maðurinn fór sjálfur og sótti sér föt og klæddi sig áður en ég náði að opna augun. Ég spurði hann hvað stæði til, jú "ég vildi bara drífa þetta af" heheh dúllan notar náttúrulega orðaforðann sem er notaður á hann venjulega. spurði svo "hvað má ég núna gera" mér datt nú í hug að það væri eitthvað sérstakt sem hann langaði að gera svo ég spurði " hvað viltu gera?" , "má ég fara í legó?" svo lék hann sér í legóinu sínu á meðan ég fór í sturtu og græjaði mig. Ekkert smá ánægður með nýja legóið sitt sem hann keypti alveg sjálfur.

Ég held það sé holt fyrir alla að hugsa svona, safna sér fyrir því sem mann langar í og njóta þess svo miklu betur á eftir. Ekki fá allt upp í hendurnar, ekki kaupa allt á visa-rað eða eyðslulánum. Ekki borga eftirá. Ég veit það er hægara sagt en gert! og ég veit líka að margir eru farnir að hugsa svona núna eftir hrun. Sumpart af því það er ekki eins aðgengilegt að kaupa án þess að eiga fyrir því, en sumpart af því fólk vill breita.